ساوندي/ ساوڙي: هي هڪ قديم ۽ آڳاٽو شهر هو، جيڪو راجا ’ڪشنڪ‘ اڏايو هو. ڊاڪٽر نبي بخش خان بلوچ صاحب ’چچ نامي‘ (ص 511) تي هن شهر کي تعلقي موري جو موجوده ڳوٺ/ شهر ’ساوڙي‘ سڏيو آهي. ڪي محقق ساوڙي ۽ ساونديءَ تي اختلاف رکن ٿا. هينري ڪزنس به پنهنجي ڪتاب ۾ (ص 59) توڙي پليٽ نمبر 5 ۾ ’ساونديءَ‘ کي ڏيپر گھانگھري، برهمڻ آباد جو ٻيو نالو ۽ ڀڙي المنصوره جو ٻيو نالو لکيو آهي. ڪجھه محقق چچ نامي واري بيان کي آڏو رکي لکن ٿا ته ’برهمڻ آباد جي انتظام بعد ، فاتح سنڌ، اروڙ لاءِ ڪوچ ڪندي، واٽ تي ساونديءَ ۾ قيام ڪيو هو.‘ ان بنياد تي ڊاڪٽر بلوچ صاحب جي را ءِ کي وزندار سمجهيو وڃي ٿو.